#TantanganGurusiana

#Tantangan Hari Ke-8

Siap sumbayang Dzuhur, ambo langsuang maiduik an masin oto, sobab ambo lah bajanji jo kawan ambo ka pai baralek ka tampek kawan ambo yang tingga di Padang Panjang.

Kami lah bajanji baso kawan ambo tu ka naiak oto di simpang Piladang, sabab nyo tingga agak ka dalam saketek masuak jalan ka Sangka, kiro-kiro 150 meter lah dari simpang tu.

Sambie mambaok oto, ambo puta lagu minang nan mandayu-dayu buliah ndak sunyi se ambo surang di ateh oto ambo tu.

Singkek curito, kutiko kami lah tibo di kampuang kawan yang baralek tu, kawan ambo tu batanyo la bakeh ambo

"Lai babaok denah nyo, kanti? Sambie malengong mancaliak ka ambo.

Taingek ambo jo undangan yang diagiah kawan tu dulu kutiko ado acara di Padang, antah dima lah talatak an undangan nyo tu, sambie banyanyi-nyanyi manuruik kan musik nan baputa di ateh oto, untuak mailangan tarangah, ambo jawab sajo jo jawaban santai

"Ndak, nti, awak lai masih ingek jo rumanyo, awak lah pernah kasitu dulu" padohal awak kasitu limo tahun yang lalu, kutiko itu sambie mancaliak urang gaek nyo yang padusi nan sadang sakik.

Batue sajo, pas kami baranti manjalang korongan rumah kawan yang baralek tu, lah diparkir oto elok-elok di tapi jalan sahinggo ndak kamaambek urang lalu, kami langsuang masuak ka gerbang muko rumahnyo dan langsuang maiisi buku tamu, jo mamasuak an amplop ka dalam rumah adat ketek yang biaso di pakai urang untuak ka tompek amplop dek tamu nan indak mambaok kado.

Lah baambiak nasi jo samba sacukuik nyo nan bahidangkan mode hidangan Parancis bak kecek urang kini, lengkap jo aie galeh nan lah talatak disabalah tampek hidangan tu.

Lah tamakan nasi sa sendok duo sendok, antah manga pulo mato ko, taarah kan ka pengantin nan sadang duduak di ateh palaminan, tasirok darah di dado, lah tabik ramang kuduak jo ramang-ramang nan lain. kutiko mato mancaliak ka pengantin tu, raso-raso alun pernah basuo. Antah kama malu ka disuruak kan, tapi ambo bausao wajah ambo jan sampai dicaliak kawan ambo, mamerah eakatu itu, raso nyo baa ka capek sajo makan, pai dari tampek urang baralek tu. Untuak mailangan raso tarangah ambo icak-icak ndak tajadi apo-apo.

Makan lah siap, dan kutiko ka mangucapkan salam ka pengantin, untuang sajo pengantin tu, masuak ka rumah, inyo tu ka batuka baju kecek etek-etek yang ado di situ sabab ado yang batanyo, inyo ka basalaman pulo jo pengantin, dan untuang sajo ucapan selamat lai ndak jadi dan kami kalua dari situ manuju ka tampek oto diparkirkan tadi.

Lah naiak kami ka ateh oto, indak tatahan galak dek ambo, sahinggo kawan ambo tadi mancaliak ka ambo jo raso heran mungkin bacampua jo penasaran

"Baa jak nyo, kanti?" kecek nyo.

Lah abih galak ambo, baru ambo kecek an ka inyo bahaso "kito lah sasek masuak nti, kironyo kawan yang baralek tu ndak yang iko do". Ambo ndak pulo batanyo tadi ka urang di tampek itu manjalang masuak gerbang tu, sia namo yang baralek ko, sabab nan biasonyo foto pengantin dipajang urang di gerbang rumah urang nan baralek tu buliah ndak sasek urang tibo, akhirnyo kami kikik-kikik an dek galak sampai kalua aie mato.

Lah bajalan kami sahinggo lewat dari gerbang rumah tu, kami icak-icak batanyo ka etek-etek nan alah babaliak baralek dari tampek tadi "Dima rumah si Rudi yang baralek hari kini tu tek?" tanyo ambo ka etek-etek tu.

"Oo sakiro sakilo lai lah", kecek etek yang babaju merah yang manjujuang dulang nan alah kosong, "oo, yolah tek, makasih yo" kecek ambo nan sugiro mamijak gas buliah capek pulo tibo di rumah kawan yang baralek tu.

Lah siap makan di tampek Rudi yang baralek tu, kutiko basalaman jo mangucapkan salamaik ka inyo jo bini nyo, ambo bisiak an lah ka inyo bahaso lah sasek kami baralek tadi karumah yang manjalang rumah Rudi kini ko, sambie manahan galak. Mandanga kato-kato ambo tu, langsuang tapanca galak si Rudi dan bini nyo hanyo mancaliak-caliak sajo, mungkin heran-heran antah apolah nan digalak kan dek uda nyo jo ambo.

"Ooo, iyo itu bana ambo nan lupo mangecek an ka kanti, rumah tu lah ambo jua dulu, dan kini kebetulan pulo nyo sdang mamparalek an anak nyo nan partamo", kecek Rudi nan masih galak-galak sampai tapanca aie mato nyo.

Akhirnyo kami pulang, dan di ateh oto, ndak hanti-hanti nyo bacurito tantang pangalaman tadi nan ndak ka lupo sampai isuak.

Lain lo sero nyo bacurito jo mangetik jo bahaso urang awak ko, tapi sakali-kali ancak juo, buliah ndak ilang bahaso kito nan ka dibaco anak-anak jo generasi kito di maso nan ka datang.

Payokumbuah, Minggu 16 Pebruari 2020, Tangah Malam Langang.